ඉන්දියාවේ 5.8 භූ කම්පනයක් – ජනතාව භීතියට
ඊසානදිග ඉන්දියාවේ අසාම් ප්‍රාන්තයේ දිස්ත්‍රික්ක කිහිපයකට අද පස්වරු 4.41ට පමණ රික්ටර් මාපකයේ 5.8ක ප්‍රබලත්වයෙන් යුත් භූ කම්පනයක් සිදුව ඇති බව ආපදා කළමනාකරණ අධිකාරිය තහවුරු කරයි.
මෙම භූ කම්පනයේ කේන්ද්‍රය උදල්ගුරි (Udalguri) දිස්ත්‍රික්කයේ අඩු ගැඹුරකින් සටහන් වී ඇති අතර, අවට ප්‍රදේශවල දැඩි කම්පන දැනී තිබේ. අදාළ ප්‍රදේශවල ජනතාව භීතියට පත් වී නිවෙස්වලින් පිටතට පලා ගිය බව ද වාර්තා වෙයි.
කෙසේ වෙතත්, මෙතෙක් කිසිදු මිනිස් ජීවිත හානියක් හෝ දේපළ හානියක් වාර්තා වී නැති බව රජයේ නිලධාරීන් නිලව තහවුරු කර ඇත.
ඉහළ භූ කම්පන අවදානම් කලාපයක පිහිටි අසාම් ප්‍රාන්තය නිතරම මෙවැනි සිදුවීම්වලට ලක්වෙන අතර, 2021 දී සොනිට්පූර් දිස්ත්‍රික්කයේ සිදුවූ 6.4ක භූ කම්පනය නගර කිහිපයකට දැඩි ව්‍යුහාත්මක හානි සිදු කළේය.
source – lankacnews
