ප්‍රමිතියෙන් තොර සම සුදු කරන ආලේපන තහනම් කිරීමට නව පනතක්
ප්‍රමිතියෙන් තොර සහ සෞඛ්‍යයට අහිතකර රූපලාවණ්‍ය ද්‍රව්‍ය, විශේෂයෙන්ම සම සුදු කරන ආලේපන, වෙළෙඳපොළෙන් ඉවත් කිරීම සඳහා නව රූපලාවණ්‍ය පනත් කෙටුම්පතක් මෙම වසර අවසන් වීමට පෙර පාර්ලිමේන්තුවට ඉදිරිපත් කරන බව කොළඹ ජාතික රෝහලේ චර්ම රෝග පිළිබඳ විශේෂඥ වෛද්‍ය ඉන්දිරා කහවිට මහත්මිය ප්‍රකාශ කරයි.
සෞඛ්‍ය ප්‍රවර්ධන කාර්යාංශයේ ඊයේ (17) පැවති මාධ්‍ය හමුවකදී අදහස් දක්වමින් ඇය සඳහන් කළේ, මෙම පනත සම්මත වීමෙන් පසු නීති විරෝධී ආලේපන භාවිතය සහ අලෙවිය තහනම් වනු ඇති බවයි. පසුගිය වසර තුන තුළ ජාතික ඖෂධ නියාමන අධිකාරිය විසින් රූපලාවණ්‍ය ආලේපන වර්ග 9,000ක් පමණ ලියාපදිංචි කර ඇති බවද ඇය හෙළි කළාය.
රසදිය වැනි විෂ රසායනික ද්‍රව්‍ය අඩංගු සම සුදු කරන ආලේපන දිගුකාලීනව භාවිත කිරීමෙන් දියවැඩියාව සහ වකුගඩු රෝග වැනි බරපතළ රෝගාබාධ ඇතිවිය හැකි බවට විශේෂඥ වෛද්‍යවරිය අනතුරු ඇඟවීය. සම මත ආලේප කරන විෂ ද්‍රව්‍ය රුධිරයට එක්ව මුළු ශරීරයම රෝගී කරන බවද ඇය පෙන්වා දුන්නාය.
ගර්භණී මව්වරුන් මෙවැනි ආලේපන භාවිත කිරීමෙන්, දරුවන්ගේ ඉගෙනීමේ දුර්වලතා, මතකය අඩුවීම සහ සංවර්ධන ක්‍රියාකාරකම් ප්‍රමාද වීම වැනි තත්ත්වයන් ඇතිවිය හැකි බව ඇය අවධාරණය කළාය. එමෙන්ම, ළදැරියන්ගේ සමෙහි පවුඩර් ආලේප කිරීමෙන් ඩිම්බකෝෂ පිළිකා අවදානමක් ඇතිවිය හැකි බැවින් කුඩා දරුවන්ට පවුඩර් සහ කොලෝන් භාවිතයෙන් වළකින ලෙසද ඇය ඉල්ලා සිටියාය.
රූපලාවණ්‍යාගාර (සැලෝන්) තුළ සම සුදු කරන ආලේපන නිෂ්පාදනය කිරීමට කිසිදු නීතිමය අවසරයක් නොමැති බව අවධාරණය කළ වෛද්‍ය කහවිට මහත්මිය, එවැනි ස්ථානවලින් ලබා දෙන නිෂ්පාදන ප්‍රතික්ෂේප කිරීම පාරිභෝගිකයා සතු වගකීමක් බවද කියා සිටියාය. ශාකසාර නිස්සාරකවලින් නිෂ්පාදනය කළද ඇතැම් ආලේපන අහිතකර විය හැකි බැවින් ඕනෑම රූපලාවණ්‍ය ද්‍රව්‍යයක් භාවිත කිරීමේදී වඩාත් සැලකිලිමත් විය යුතු බවද ඇය වැඩිදුරටත් පැවසුවාය.
