පොහොට්ටුවේ සම්පත් මනම්පේරි අධිකරණයට භාර වෙයි
‘අයිස්’ මත්ද්‍රව්‍ය නිෂ්පාදනය සඳහා අවශ්‍ය අමුද්‍රව්‍ය අඩංගු බහාලුම් දෙකක් සඟවා තැබීම සම්බන්ධයෙන් චෝදනා ලබා සිටින සම්පත් මනම්පේරි අද (17) වලස්මුල්ල මහේස්ත්‍රාත් අධිකරණයට භාර වී තිබේ.
මීට පෙර, සැප්තැම්බර් 15 වන දින, ඔහුගේ නීතිඥවරයා අභියාචනාධිකරණයට දන්වා සිටියේ ස්ඵටික මෙතම්ෆෙටමින් (අයිස්) නිෂ්පාදනයට යොදා ගන්නා බවට සැක කෙරෙන රසායනික ද්‍රව්‍ය අඩංගු මිද්දෙනිය ප්‍රදේශයේ තිබී සොයාගත් බහාලුම් දෙක සම්බන්ධයෙන් තම සේවාදායකයා අධිකරණයට භාර වීමට සූදානම් බවයි.
අභියාචනාධිකරණය මෙම තොරතුර සලකා බනිමින්, මනම්පේරි භාර වීමෙන් පසු ඔහුගේ ආරක්ෂාව සහතික කිරීමට අවශ්‍ය පියවර ගන්නා ලෙස පොලිස්පතිවරයාට නියෝග කළේය. එමෙන්ම, විමර්ශන නිලධාරීන්ටද එම නියෝගයට අනුකූල වන ලෙස උපදෙස් ලබා දෙන ලදී.
මෙම නියෝගය නිකුත් කරනු ලැබුවේ මනම්පේරිගේ නීති කණ්ඩායම විසින් ගොනු කරන ලද රිට් පෙත්සමක් සලකා බැලීමෙන් අනතුරුව වන අතර, මෙම සිද්ධිය සම්බන්ධයෙන් ඔහු අත්අඩංගුවට ගැනීම අත්‍යවශ්‍ය බව අධිකරණය එහිදී අවධාරණය කර තිබිණි.
