අකුරට වැඩ කරනවා: ලෙඩ නිවාඩු දානවා – මෙහෙම වැඩ කරන්න බැහැ
“අලුත් දේශපාලනයට හැඩගැහෙන්න, නැතිනම් දාලා යන්න” – ජනාධිපති අනුර කුමාර දිසානායක
“අකුරට වැඩ කිරීම” සහ “ලෙඩ නිවාඩු දැමීම” වැනි ක්‍රමවේදවලට අනුව කටයුතු කළ නොහැකි බවත්, රාජ්‍ය සේවකයින් නව දේශපාලනයට අනුගත විය යුතු බවත් ජනාධිපති අනුර කුමාර දිසානායක මහතා අවධාරණය කරයි. ඔහු මෙම අදහස් පළ කළේ ඊයේ (17) දින කඩවත සහ කොළොන්නාව යන ස්ථානවල පැවති උත්සව දෙකකට සහභාගී වෙමිනි.
යටිබිම්ගත රාජ්‍යය අවසන් කිරීම
මධ්‍යම අධිවේගී මාර්ගයේ කඩවත සිට මීරිගම දක්වා වූ කොටසේ ඉදිකිරීම් යළි ආරම්භ කිරීමේ උත්සවයට එක්වෙමින් ජනාධිපතිවරයා ප්‍රකාශ කළේ, මතුපිටින් පෙනෙන රාජ්‍යයට සමාන්තරව “කළු රාජ්‍යයක්” හෝ “යටිබිම්ගත රාජ්‍යයක්” ක්‍රියාත්මක වන බවයි. මෙම යටිබිම්ගත රාජ්‍යය සංවිධානාත්මක අපරාධ, මත්ද්‍රව්‍ය ජාවාරම් සහ තැන තැන වෙඩි තැබීම්වලින් සමන්විත බවත්, නීත්‍යනුකූල හමුදාවෙන් අවි ආයුධ ලැබෙන, පොලීසියෙන් ආරක්ෂාව ලබන සහ දේශපාලන අධිකාරියේ සහාය ලබන මෙම කළු රාජ්‍යය ස්ථිර වශයෙන්ම අවසන් කරන බවත් ඔහු කීවේය.
රජයේ යාන්ත්‍රණයේ සිටින ඇතැම් පුද්ගලයින් තවමත් පරණ ක්‍රමවේදවලට අනුගතව සිටින බව පෙන්වා දුන් ජනාධිපතිවරයා, “අපි නැවත නැවත කියන්නේ අලුත් දේශපාලනයට අනුව හැඩගැහෙන්න කියලා. එසේ නොමැති නම් ඔවුන්ට දාලා යන්න පුළුවන්. දාලා යන්නේ නැත්නම් ඔවුන්ව අපි අයින් කරනවා” යනුවෙන් දැඩි ස්ථාවරයකින් කතා කළේය.
විදුලිබල මණ්ඩලය සහ රාජ්‍ය සේවය
කොලොන්නාව තෙල් ගබඩා සංකීර්ණයේ තවත් ටැංකි 6ක් ඉදිකිරීමේ ව්‍යාපෘතිය ආරම්භ කිරීමේ අවස්ථාවට එක්වෙමින් ජනාධිපතිවරයා විදුලිබල මණ්ඩලය ගැන ද අදහස් දැක්වීය. එහි සේවකයින් 26,000කට ආසන්න සංඛ්‍යාවක් සිටියද, ආයතනයේ අර්බුදයට අයිතිකරුවෙකු නැති බව ඔහු සඳහන් කළේය.
පෙර යෝජනා වූ පරිදි විදුලිබල මණ්ඩලය පෞද්ගලීකරණය නොකර, සේවක අයිතිවාසිකම් ආරක්ෂා කරමින් නව ප්‍රතිපත්ති ක්‍රියාත්මක කිරීමට තීරණය කළ බව පැවසූ ඔහු, “දැන් අකුරට වැඩ කරනවා. ලෙඩ නිවාඩු දානවා. මෙහෙම වැඩ කරන්න බැහැ.” යනුවෙන් පැවසීය. මහජන මුදලට ගරු කරන සහ සාංඝික දේපලක් මෙන් ආරක්ෂා කරන රාජ්‍ය සේවාවක් තමා අපේක්ෂා කරන බව ජනාධිපතිවරයා අවධාරණය කළේය.
