ඉන්දුනීසියාවේ විරෝධතා තවත් දරුණු අතට – පාර්ලිමේන්තු ගොඩනැගිලි ගිනිගැනීම්, මරණ 3ක්
ඉන්දුනීසියාවේ විරෝධතා රටවල් කරවයි – පාර්ලිමේන්තු ගොඩනැගිලි ගිනිගැනීම්, මරණ 3ක්
ඉන්දුනීසියානු රජය වෙත දේශපාලන සහ ආර්ථික ප්‍රතිසංස්කරණය ඉල්ලමින් ආරම්භ වූ විරෝධතා තවත් ප්‍රචණ්ඩ මට්ටමකට පත්ව ඇතැයි විදෙස් මාධ්‍ය වාර්තා කරයි.
පසුගිය බ්‍රහස්පතින්දා ජකර්තා නගරයේ ආරම්භ වූ විරෝධතා මාලාව අඛණ්ඩව දිග හැරී ඇති අතර, පොලිසිය විරෝධතා පැතිරීම වැළැක්වීමට කටයුතු කරන අතරතුර පොලිස් වාහනයක ගැටී යතුරුපැදිකරුවෙක් මියගිය බවත් එම සිද්ධියට විරෝධය පළ කරමින් බන්ඩුන්ග් නගරයේදී දැඩි විරෝධතා පවත්වා ඇති බවත් වාර්තා වේ.
ඉන්දුනීසියානු විරෝධතාකරුවන් ගොඩනැගිලි ගිනි තැබීම, දේපළවලට හානි කිරීම සහ ප්‍රාදේශීය පාර්ලිමේන්තු ගොඩනැගිලි විනාශ කිරීමේ ක්‍රියාකාරකම් සිදු කර ඇත. විශේෂයෙන් බටහිර නුසා ටෙන්ගාරා, මධ්‍යම ජාවා (පෙකලෝන්ගන්) සහ බටහිර ජාවා (සයිරබන්) නගරවල පාර්ලිමේන්තු ගොඩනැගිලි විනාශ වී තිබේ.
මේ වන විට විරෝධතා හේතුවෙන් පුද්ගලයින් 3 දෙනෙකු මිය ගොස් ඇති අතර තවත් 5 දෙනෙකු තුවාල ලබා ඇත. මියගිය අයගෙන් කිහිප දෙනෙකු ගිනි තැබූ ගොඩනැගිලිවල සිරවී මියගිය බවද වාර්තා වෙයි.
විදෙස් මාධ්‍ය සඳහන් කරන්නේ, මෙම විරෝධතා තවදුරටත් පාලනය කිරීමට ඉන්දුනීසියානු බලධාරීන්ට අපහසුතා ඇතිවන තත්ත්වයක් පවතින බවයි.
