ශ්‍රී ලංකා ගමනාගමන මණ්ඩලයේ (ශ්‍රී ලංගම) ඇතැම් වෘත්තීය සමිති ආරම්භ කළ වැඩ වර්ජනය නිසා 87 මාර්ගයේ මගීන් පෙරේදා (27) රාත්‍රියේ ගමනාගමනයේ අපහසුතාවයට පත්වූවද, ඊයේ (28) වන විට බස් සේවාව යථා තත්ත්වයට පත් විය.
මෙම වෘත්තීය ක්‍රියාමාර්ගය ආරම්භ කර ඇත්තේ, ශ්‍රී ලංගම සහ පෞද්ගලික බස් සඳහා එකම කාලසටහනක් හඳුන්වා දීමේ උත්සාහය සම්බන්ධයෙන් විරෝධය පළ කිරීමෙනි.
පසුගිය 25 වනදා මධ්‍යම රාත්‍රියේ සිට, කොළඹට පැමිණෙන ප්‍රධාන මාර්ගයක් වන පුත්තලම මාර්ගයේ බස් රථ සඳහා එම ඒකාබද්ධ කාලසටහන ක්‍රියාත්මක කළ අතර, එය සකස් කිරීමේදී තම අදහස් විමසී නොමැති බවට චෝදනා කරමින් ශ්‍රී ලංකා නිදහස් ප්‍රවාහන සේවක සංගමය ඇතුළු වෘත්තීය සමිති හතක් වර්ජනයට එක්වීය.
SLTB strike fails – services restored
කෙසේවෙතත්, වර්ජනයට එක්වූ කණ්ඩායම හැර, අනෙකුත් රියදුරන් සහ සේවකයින් ඊයේ (28) සාමාන්‍ය සේවයට පැමිණිය අතර, කොටුව මධ්‍යම බස් නැවතුම්පොළෙන් මහනුවර, අනුරාධපුරය වැනි දුර ගමන් සේවා බස් රථ අඛණ්ඩව ධාවනය විය.
සමස්ත ලංකා ප්‍රවාහන සේවක සංගමයේ ප්‍රධාන ලේකම් සේපාල ලියනගේ මහතා ප්‍රකාශ කළේ, වැඩ වර්ජනය අසාර්ථක වූ අතර ලංගම බස් රථ බහුතරයක් සාමාන්‍ය පරිදි ධාවනය වූ බවයි.
ඒ අතර, ජාතික ගමනාගමන කොමිසමේ සභාපති පී.ඒ. චන්ද්‍රපාල මහතා පැවසුවේ, මෙම ඒකාබද්ධ කාලසටහන සකස් කර ඇත්තේ ජාතික ගමනාගමන කොමිසම සහ ශ්‍රී ලංගම නිලධාරීන්ගේ එකඟතාවයෙන් බවත්, එමගින් ශ්‍රී ලංගම ආයතනයට කිසිදු අසාධාරණයක් සිදු නොවන බවත්ය.